أثر المصايب ماتجيك الا من الناس القراب وبهالزمن حتى الخوي الي تثق فيه احذره الصاحب اللي مايجي من صحبته غير العذاب نذر علي ان ماهجرني وإلا انا...

أثر المصايب ماتجيك الا من الناس القراب وبهالزمن حتى الخوي الي تثق فيه احذره

الصاحب اللي مايجي من صحبته غير العذاب
نذر علي ان ماهجرني وإلا انا اللي بـ أهجره

من يفتح لفرقاي باب أفك له عشرين باب
وإذا خويي مايقدر خوّتي ما أقدره

إن روّحوا فأنا بريٍ منهم ليوم الحساب
وإن جرحوا قولوا لهم ماحركوا فيَّ اشعره

شفهم لهم حول السنه ولاخذوا مني جواب
أحسن دوا للي يحاول يستفزك تحقره

عقب اكتئاب البارحة ماعاد أنا حمل إكتئاب
الطيب جرجرني وأنا ماني ناقص جرجره

أنا تجرعت الظما لين احترق وجهي وذاب
أنا كسرت بخاطري قبل الصداقه تكسره

أنا خسرت اللي غيابه غير عن كل الغياب
أنا غفرت لعالمٍ ماتستحق الـمـغـفــره

أنا أكثر (انسانٍ) تعلم من كثر ما أخطأ واصاب
أنا آخر (لسان) يتكلم في زمن الـثـرثـره

جفني وجرّحْه السهر،حيلي وهدّته الصعاب
دمعي هدر،ضحكي ندر،عمري وضيعت أكثره

شيبّت بعقول العرب..هيبّت روس ماتهاب
جمهرت ناسٍ عمرهم مايعرفون الجمهره

ماصرت ذيب إلا لأن اللي تحدوني ذياب
ماكنت أغيب إلا لأن العفو عند المقدره

ترى حلاتك لاحملت لصاحبك كلمه عتاب
أنا مانطقت بها بوجهه ماتذمه بظهره

في هالزمن مايملي عيون الحسود الا التراب
والا الحظيظ..الطلقه اللي ماتصيبه تذعره

ودّك اليامن جاتك الغلطه من الناس القراب
الصاحب اللي ماكسبت محبته ماتخسره