قسوة غيابك

تدري وش اقسى من الحرمان والحيره!!
الدمعه اللي على خدي من اسبابك

مليت صدك.. وقلبك بان تقصيره
لين ابتسم لي ردى حظي وغنابك

غيب وجروحي فـغيابك علّها خيره
يمكن ليا غبت تعرف قيمة احبابك

بعلمك شي.. واترك باقي السيره
سيرة عذابي وحرماني من اهدابك

تدري وش اصعب من غيابك وتبريره!!
لا قلت وينك وانا واقف على بابك

تدري!! تأكدت وضعك صعب تغييره
لذا.. عشاني حبيبي احسب حسابك

اني بسافر بجرحي واترك الديره
وانت بغيابي تمسك حييييييييل باصحابك

وقت الوفا والمحبه صعب تكريره
والوقت لاطاف ماينفعني عتابك

مشهد رحيلك عن عيوني وتصويره
شفته قبل تكتبه في صفحة كتابك

البعد.. قلبي غصبني مايبي غيره
ياسبة جروح قلبي وش هي أتعابك

لا صار وضعك خطير وصعب تطويره
لابد اداوي جروحي واترك ركابك

مع السلامه.. وقلبي حان تحريره
ماظن ابسألك لو عودت وش جابك

قسوة غيابك لو ان مابان تأثيره
ماكان الاشواق تسألي عن غيابك

مادام قلبك نسى الاحساس والغيره
لا تنتظر قلب لا من ضاق يسهى بك